រូប​ថត​ជនភៀស​ខ្លួន​ខ្មែរ​នៅ​ក្រុង Chicago​ ​នៅ​​អាមេរិក​ទសវត្សរ៍​៨០​និង​៩០

រូបថតទាំងនេះបានដកស្រង់ចេញពីសៀវភៅមួយក្បាលមានចណជើងថា គ្រួសារ៖ ជ្រុង​មួយ​នៃ​ជីវិត​នៅ​តំបន់ Argyle និង​Glenwood» ​ឬ (Krousar: On the Corners of Argyle and Glenwood) ត្រូវបាន​រៀបរៀង​ឡើងដោយលោក Stuart Isett អ្នកថតរូបអាជីពជនជាតិអាមេរិកាំង លោក ស៊ីឡុង ឈុន (Silong Chhun) សិល្បៈករនិងសកម្មជនគាំពារសិទ្ធិពលរដ្ឋខ្មែរអាមេរិកាំងនៅទីក្រុង Tacoma រដ្ឋ Washington និងលោក ភីតធឺ ពិន (Peter Pin) អ្នកថតរូបអាជីពខ្មែរអាមេរិកាំង នៅទីក្រុងញូវយ៉ក កាលពីដើមឆ្នាំ ២០២១ នេះ​ ដោយ​អម​ជា​មួយ​រូបថត​ដ៏​កម្ររបស់​គ្រួសារ​ខ្មែរ​មួយចំនួន​នៅ​តំបន់ ​Argyle និង​ Glenwood ​ក្នុង​ទីក្រុង​ Chicago​ ​រដ្ឋ​ Illinois។
តាមរយៈសៀវភៅនេះបានបង្ហាញពីបទ​ពិសោធន៍​របស់​ជន​ភៀស​ខ្លួន​ខ្មែរ​ក្នុង​ការ​កសាង​ជីវិត​ថ្មី​និង​សម្រប​ខ្លួន​តាម​របៀប​របប​រស់​នៅ​ក្នុង​សហ​រដ្ឋ​អាមេរិក​ក្នុង​ចន្លោះ​ទសវត្សរ៍​ ១៩៨០ ​និង​ ១៩៩០ ​ហើយក៏មិនទាន់បាន​ចងក្រង​និង​ពណ៌នា​ឱ្យបាន​ស៊ីជម្រៅ​នៅ​ឡើយ​ទេ ។
សម្រាប់​ជនភៀស​ខ្លួន​ខ្លះ​សៀវភៅ​រូបថត​នេះ​ជួយ​ឱ្យ​ពួក​គេ​យល់​ដឹង​ពី​បទ​ពិសោធន៍​របស់​ជនភៀស​ខ្លួន​ខ្មែរ​ដទៃ​ទៀត​ដែល​ពួកគេ​មិន​បាន​ដឹង​ពី​មុន។​ រីឯជន​ភៀស​ខ្លួន​ខ្លះ​ទៀត​សៀវភៅ​រូបថត​នេះ​ធ្វើ​ឱ្យបទ​ពិសោធន៍​ផ្ទាល់​ខ្លួន​របស់​ពួកគេ​មាន​ន័យ។​
សៀវភៅដែល​មាន​ចំណង​ជើង​ថា​«គ្រួសារ៖ On the Corners of Argyle and Glenwood»​ នេះ​ឬ​ជា​ភាសាខ្មែរ​ «គ្រួសារ៖ ជ្រុង​មួយ​នៃ​ជីវិត​នៅ​តំបន់ Argyle និង ​Glenwood» មាន​រូបថត​សខ្មៅ​ជិត​ ២០ ​សន្លឹក។​

ស្ត្រីខ្មែរជាម្តាយ អង្គុយលើកន្ទេលជាមួយកូនតូចៗ

ពិធីរៀបមង្គលការបែបប្រពៃណីខ្មែរ

កូនកំលោះ នៅថ្ងៃរៀបមង្គលការ

រូប​ថត​ខ្លះ​បង្ហាញ​ឲ្យ​ឃើញ​យុវជន​ខ្មែរស្លៀក​ពាក់​បែប​ Hip Hop​ ជួប​ជុំ​គ្នា​ជា​ក្រុម។ រូប​ខ្លះ​ទៀត​បង្ហាញ​ស្ត្រី​ជា​ម្តាយ​អង្គុយ​លើ​កន្ទេល​នៅ​លើ​វាលស្មៅ​មុខ​អគារ​លំនៅដ្ឋានជាមួយ​កូន​តូចៗ។​រូប​ខ្លះ​ទៀត​បង្ហាញ​ស្ត្រី​ចាស់ៗ​កោស​ខ្យល់​ឲ្យ​កូន​ចៅ​ហើយក៏​មាន​រូប​ថត​នៃ​ពិធី​មង្គលការ​បែប​ប្រពៃណី​ខ្មែរ​ក្នុង​ផ្ទះ​ដ៏​តូច​ចង្អៀត​ផងដែរ។​រូបថត​ទាំង​អស់​នេះ​លាត​ត្រដាង​ពី​ជ្រុង​មួយ​នៃជីវិត​រស់​នៅ​ប្រចាំ​ថ្ងៃ​របស់​គ្រួសារ​ខ្មែរ​មួយ​ចំនួន​ដែល​ទើប​តែ​មក​រស់​នៅ​ក្នុង​តំបន់​ Argyle ​និង​ Glenwood ​ក្នុង​ទីក្រុង Chicago​ រដ្ឋ Illinois នា​ដើម​ទសវត្សរ៍​១៩៩០។

Related Posts